Al 2017 jyldyń sońynda KPMG aýdıtorlyq kompanııasy Qordyń aqparattyq júıesin aýdıtten ótkizgen bolatyn. Aýdıtorlar Qordyń negizgi úderisteriniń avtomattandyrylý deńgeıi 82 paıyzdy quraıdjy dep baǵalady. 2017 jyldyń ekinshi jartysynan bastap Qor zeınetaqy qyzmetterin kórsetetin negizgi júıelerdiń toqtap qalý ýaqytyn baqylaýǵa aldy. Aqparattyq júıelerdiń úzdiksiz jumys isteý kórsetkishi – 99,98 paıyzdy qurady.
Bıyl zeınetaqymen qamtamasyz etý salasyndaǵy aqparattyq qyzmetterdiń úzdiksizdigin qamtamasyz etý úshin metroklaster qurý jáne Almaty men Astana qalalarynda aqparattar óńdeýdiń rezervtik ortalyǵyn jasaqtaý jumystary júrgizilýde. Bul jobany júzege asyrý elimizdiń oblystarynyń birinde úlken tabıǵı nemese tehnogendik apat bolǵannyń ózinde, Qordyń aqparattyq qyzmetin úzdiksiz jáne tolyqqandy aýqymda jalǵastyrýǵa múmkindik beredi.
Zeınetaqy zańnamasynyń ózgerýine jáne elektrondyq servısterdiń damýyna baılanysty jeke málimetterdi esepteý júıesi árdaıym jańartylýda. Mysaly, 2018 jyldyń basynda júıede zeınetaqy tólemderin keste boıynsha, sonyń ishinde zeınetaqy tólemderin keste boıynsha aı saıyn júzege asyrýǵa qatysty mindet-tásilderi jańartyldy. Qor qyzmetterin BJZQ bólimderine baryp qana emes, dástúrli jáne elektrondy poshta arqyly, www.enpf.kz saıtynda «jeke kabınet» ashý arqyly, uıaly qosymsha kómegimen, e-gov.kz elektrondyq úkimeti saıtynda, óz-ózine qyzmet kórsetý termınaldarynda da alýǵa bolady. Bul qyzmetterge júginýshiler qatary kún sanap artyp keledi.
ENPF uıaly qosymshasyn júktegender sany 2018 jyldyń 5 aıynda 305,8 myń birlikke jetti. Bul ótken jyldyń osy kezeńimen salystyrǵanda 6 paıyzǵa artyq (287 myń júkteme).
Esterińizge sala keteıik, 2017 jyly zeınetaqy qory enpf.kz saıty arqyly zeınetaqy shotyn ashýǵa aryz berý, jeke derektemelerge ózgeris engizý, ınternet-habarlandyrý ádisin tańdaý, tólem jasaýǵa ótinish berý, onyń oryndalýyn onlaın-rejımde qadaǵalaý syndy birqatar elektrondyq qyzmet túrlerin engizdi. Bıyl enpf.kz saıty arqyly zeınetaqy kelisiminiń kóshirmesin alý qyzmeti qoljetimdi boldy. Elektrondyq qyzmetter bar-joǵy birer mınýtta kórsetiledi.
Jańa elektrondyq qyzmetter iske qosylǵannan beri ol 2018 jyldyń 1 shildesine deıin 55 800 ret qodanylǵan. Naqty aıtqanda, Qor saıtyndaǵy «jeke kabınet» arqyly 12 500 jeke zeınetaqy shoty ashylǵan (JSN jáne qupııa sóz nemese Halyqqa qyzmet kórsetý ortalyǵynda beriletin elektrondyq sıfrlyq qoltańba arqyly). 3 226 alýshy (zeınetaqy jasyna kelgen nemese 1, 2 toptaǵy múgedektigi merzimsiz taǵaıyndalǵan azamattar) zeınetaqy tólemderin jasaý týraly ótinish bergen. Jeke derektemelerge 30 794 ózgeris engizilip, jeke zeınetaqy shotynyń jaı-kúıi týraly habarlandyrý ádisin ózgertýdi ınternetke arqyly alýboıynsha9320 operasııa jasalǵan.
Qazirgi ýaqytta QR Aqparat jáne kommýnıkasııalar mınıstrliginiń «elektrondyq úkimet» shlıýzy arqyly QR Ádilet mınıstrliginiń Memlekettik aqparattar bazasyndaǵy «Jeke tulǵalar»bólimimen shuǵyl aqparat almasý úshin úılestirý úderisteri belsendi júrgizilýde. Taıaý arada Halyqqa qyzmet kórsetý ortalyqtarynyń (HQKO), Eńbek jáne halyqty áleýmettik qorǵaý mınıstrliginiń jáne BJZQ-nyń avtomattandyrylǵan aqparattyq júıelerin bir-birimen úılestirý arqasynda zeınetaqy taǵaıyndaý jónindegi kompozıttik qyzmet qoljetimdi bolady. Oǵan «Memlekettik bazalyq zeınetaqy tólemderin taǵaıyndaý», «Jasy kelýine baılanysty zeınetaqy tólemderin taǵaıyndaý», «Biryńǵaı jınaqtaýshy zeınetaqy qorynan zeınetaqy tólemderin taǵaıyndaý», «Zeınetaqy jınaqtaryna memlekettik kepildik tóleý» qyzmetteri kiredi.
Búginde keń qoldanysqa engen «Facebook», «VKontakte», «Tvıtter», «Odnoklassnıkı» jáne «Instagram» syndy áleýmettik jelilermen qatar, Qor bıyldan bastap chat-bottar men Telegram, Whatsapp, messenjerler arqyly aqparat taratý sharasyn engizýde. Barlyq baılanys arnalary zeınetaqy júıesi men BJZQ qyzmeti týraly qajetti aqparat alýǵa, al kerek jaǵdaıda naqty jeke saýaldar boıynsha keńes alýǵa múmkindik beredi.
Taıaý ýaqytta salymshylarmen ózara baılanysty jedeldetý maqsatynda Whatsapp (8-777-000-1418 nomeri) arqyly aqparatty Qor keńsesine baryp, qońyraý shalmaı-aq avtomatty rejımde alýǵa jol ashatyn bolady.
BJZQ-da qoldanylatyn aqparattyq tehnologııalar zeınetaqy qyzmetteriniń sapasy men qoljetimdiligin arttyrýǵa yqpal etetinin atap ótken abzal.
Daıyndaǵan Aınash ESALI,
«Egemen Qazaqstan»
ALMATY
